Acte notarié par Paul Vachon entre Marie Corriveau et Noël Rose
Pardevant paul vachon nottaire Des Seignurie
de beauport nostre dame des anges & de Lirec En lisle
Dorleans & temointz soubzsignéz feureut presente & Comparurent
En sa personne honorable femme margueritte Courivaux au nom
Et Comme Mere tutrisce des enfens mineurs de feü honorables
personne Le sieur René Maheult son feu mary de son vivant
bourgois de quebec; Et á present femme de honorables homme Le
sieur jean maheult aussy habitant bourgois dudit quebec; Laquelle
a Recogneü & Confessé Et voulant faire profiter & habiter les terres
de leurs Concession a volontairement donné & Conceddé a Tiltre de
Cens Et Rentes foncieres par chacun an payables au jour & feste
de st martin dhiver a noél Roze dit La Roze habitant demurant
de present En ladite Seignurie de Lirec a ce present & acceptant
pour luy ses hoirs Et ayant Cause a ladvenir Scavoir le nombre
de trois Arpens de terre de front seur le fleuve st Laurens
a prendre dans Lisle d’orleans au passage du nort En la seignurie de
Lirec Tenant D’un Costé a la Concession de Estienne choret dautre
Costé a la Concession de nicolas patenostres: pardevant seur ledit
fleuve st Laurens parderriere seur La Routte quy traversera Ladite
jsle de pointe En pointe; Ladite Concession faicte audit preneur
a la charges de sy establir d’avoir feü & lieu seur la presente
Concession au Aultre pour luy dans un an d’huy de Cuiltiver les
Terres & Continer a ladvenir Aultrement La presente Concession
Neulle sans depens dommages Et jnteretz ny mesme
Restitucions des depens qu’il y pourroit avoir faict
soit pour bastir & deserter; De plus ladite Concession faicte
audit Noel Roze pour & moyenant qu’il Cest obligé
de paier chacque jour & feste de st martin dhiver pour
Chacun arpent de terre de front seur le fleuve st Laurens
La somme de vingt sol thournois de Rente fonciere
douze deniers de Cens pour chacun desdis arpens de terre de
front seulement; Et pour ladite Concession deux chappons vifs Le
Tout par chacun an payables au Logis de ladite Courivaux a
quebec ou aultre lieu quy luy sera jndicqué En ladiste jsle d’orleans
Et sera Teneu & obligé ledit noel Roze de suivre la teneur
des tiltre de Concession de ladite Courivaux baillé par les seigneurs
de beaupré & de Lirec; Scavoir tant de mouldre ses grains au
moulin lotz & ventes seisinnes & amandes suivant la Coustume
de la prevosté & viconté de paris quand le cas y eschera sans
que ladite Courivaux sesdis Enfens pretende Rien seur yceux Comme
le tout appartenant auxdis seigneurs; a la charges Comme Aussy
de Laisser de chacun Costé un chemin de quinze piedz de Large Et aultant
le Long dudit fleuve pour servir de chemin & de plus pour eviter
a proces Et entretenir amytyé Entre les tenantz dudit lieu; Sera
obligé de se clore faulte De quoy jl ne pourra pretendre aucuns
dommages & jnteretz pour les delictz que pourroient faire les
bestiaux de ses voisyns; Les prés le Long dudit fleuve seront
Communs synon qu’il les pourra faire faucher seur la presente
Concession au prejudisce de tous aultres; ne pourra Ledit noel
Roze pecher que seur & vis a vis la presente Concession sans le gré
Et Consentement de ses voisyns; Et En cas de vantes ou alienation
se Reserve ladite Courivaux la preference & facultéz de Retirer
La presente Concession en Remboursant Le prix fraix & loyaux
Coutz suivant la Coustume de la prevosté & viconté de paris
soubz Laquelle ce pais est Regy & gouverné; pour jouir de
ladite Concession par Ledit Noel Rose Dit La Rose luy
ses hoirs & ayant Cause a Tousjours plenement & paisyblemt
En faire & disposer tout ainsy que bon luy semblera; Car
Ainsy a Esté le tout accordé Entre les parties promettent &c
obligeant soubz lhipotecques de tous & chacuns leurs biens
Et chacun En droit soys Renonceant &c faict & passé En
Lestude dudit nottaire ce vingtjesme jour doctobre mil six
Cent soixante & Cinq En presence de jean Crestes mre charon Et de
René chevalier mre maçon habitans Et a declaré ladite courivaux
ne scavoir signée & de ce jnterpellé suivant lordonence Et a
Requis que honnorable homme Le sieur jean bissot marchent
bourgois a quebec seubrogé Teutteur desdis enfens mineurs
signat le present Contract ce qu’il accordé La Rature aprouvée
f byssot (paraphe)
Jehan Creste (paraphe) R Chevalier (paraphe)
pvachon (paraphe) notaire R.
Transcrit par Normand Bertrand mars 2021
